உதகை அருகே பழங்குடியின முதியவரை கடுமையாக தாக்‍கிய போலீசாரை கண்டித்து, மாவட்ட காவல்துறை கண்காணிப்பாளர் அலுவலகத்தை, பழங்குடியின மக்‍கள் முற்றுகையிட்டனர்.

நீலகிரி அருகே, நெடுகல் கொம்பை கிராமத்தை சேர்ந்த கண்ணன் என்ற முதியவர், வங்கிக்‍கு சென்றுவிட்டு, அரசுப் பேருந்தில் வீடு திரும்பிக்‍ கொண்டிருந்தார். அப்போது பேருந்தில் இருந்து அவரை கீழிறங்க சொல்லி, பெண்களை கேலி செய்த வினோத் நீ தானா? எனக்‍ கூறி, போலீசார் அவரை தாக்‍கியுள்ளனர். தான் வினோத் இல்லை கண்ணன் என தெரிவித்த பின்னரும், காவல் நிலையத்திற்க்கு அழைத்து சென்று தொடர்ந்து அவரை தாக்‍கியதாக கூறப்படுகிறது. கண்ணன் படுகாயம் அடைந்த நிலையில், இது குறித்து வெளியில் சொல்லக்‍ கூடாது என, போலீசார் மிரட்டியுள்ளனர். படுகாயங்களுடன் காவல் நிலையத்தில் இருந்து வெளியே வந்த அவருக்‍கு, அரசு மருத்துவமனையில் சிகிச்சை அளிக்‍கப்பட்டது. இதைத்தொடர்ந்து பழங்குடியின மக்கள், கண்ணனுடன் சென்று, மாவட்ட காவல் கண்காணிப்பாளர் அலுவலகத்தை முற்றுகையிட்டு, போராட்டம் நடத்தினர்.