மக்கள் நலனுக்காகத் தேவைப்பட்டால் ஒன்றிணைந்து பயணிக்கத் தயார் என கமல்ஹாசன் மற்றும் ரஜினி ஆகியோர் தெரிவித்துள்ளனர்.

ஒடிசாவின் செஞ்சூரியன் தொழில்நுட்ப மேலாண்மைப் பல்கலைக்கழகம் கமல்ஹாசனுக்கு கவுரவ டாக்டர் பட்டத்தை வழங்கியது. இந்த நிகழ்ச்சியில் கலந்துகொண்ட ஒடிசா முதல்வர் நவீன் பட்நாயக், கமலுக்கு டாக்டர் பட்டத்தை வழங்கிக் கௌரவித்தார். நிகழ்ச்சி முடிந்து சென்னை திரும்பிய நடிகர் கமல்ஹாசன், விமான நிலையத்தில் செய்தியாளர்களை சந்தித்தார். அப்போது தமிழக மேம்பாட்டிற்காக பணியாற்ற வேண்டியிருந்தால் ரஜினியுடன் இணைந்து பயணிப்போம் என தெரிவித்தார்.

இதேப்போல, கோவாவில் நாளை தொடங்கும் தேசிய திரைப்பட விழாவில் கலந்துகொள்வதற்காக நடிகர் ரஜினிகாந்த் கோவா செல்கிறார். இதற்காக சென்னை விமான நிலையம் வந்த ரஜினியிடம் கமலின் கருத்து குறித்து கேள்வி எழுப்பப்பட்டது. அதற்குப் பதிலளித்த ரஜினி, தமிழக மக்களின் நலனுக்காக நானும் கமலும் இணையும் சூழல் ஏற்பட்டால் நிச்சயம் இணைவோம் என்று கூறினார்.