டெல்லியில், நிலைமையை கட்டுக்‍குள் கொண்டுவர, காவல்துறைக்‍கு முழு அதிகாரம் அளிக்‍கப்பட்டுள்ளதாக தேசிய பாதுகாப்பு ஆலோசகர் திரு. அஜித் தோவல் தெரிவித்துள்ளார்.

டெல்லி கலவரத்தில் உயிரிழந்தோர் எண்ணிக்‍கை, 18-ஆக இருந்த நிலையில், மேலும் 2 பேர் உயிரிழந்துள்ளதாக Guru Teg Bahadur மருத்துவமனை, அதிகாரப்பூர்வமாக அறிவித்துள்ளது. இதன்மூலம் கலவரத்தில் உயிரிழந்தோர் எண்ணிக்‍கை 20-ஆக அதிகரித்துள்ளது. இந்நிலையில், டெல்லியில், நிலைமையை கட்டுக்‍குள் கொண்டுவர, காவல்துறைக்‍கு முழு அதிகாரம் அளிக்‍கப்பட்டுள்ளதாக தேசிய பாதுகாப்பு ஆலோசகர் திரு. அஜித் தோவல் தெரிவித்துள்ளார். வன்முறை அதிகரித்து வரும் சில இடங்களில், கலவரக்‍காரர்களை கண்டதும் சுட உத்தரவு பிறப்பிக்‍கப்பட்டுள்ளதாக தகவல் வெளியாகியுள்ளது. யமுனா விஹார் உள்ளிட்ட வன்முறை பரவிவரும் சில பகுதிகளில், இந்த உத்தரவு பிறப்பிக்‍கப்பட்டுள்ளதாக கூறப்படுகிறது.

டெல்லி கலவர பகுதிகளை நேரில் பார்வையிட்ட திரு. அஜித் தோவல், நேற்றிரவு, அதுகுறித்து ஆலோசனையும் நடத்தினார். கடந்த 24 மணிநேரத்தில் மத்திய உள்துறை அமைச்சர் அமித்ஷாவும் இது தொடர்பாக 3 முறை ஆலோசனை நடத்தியுள்ளார்.

இந்நிலையில், டெல்லி நிலவரம் குறித்து, மத்திய அமைச்சரவைக்‍கூட்டம் தற்போது நடைபெற்று வருகிறது.