டெல்லி வன்முறையில் உயிரிழந்தவர்கள் குடும்பத்துக்கு, பத்து லட்சம் ரூபாய் நிதியுதவி வழங்கப்படும் என்று, அம்மாநில முதலமைச்சர் திரு. அரவிந்த் கெஜ்ரிவால் அறிவித்துள்ளார்.

டெல்லியில் ஜாப்ராபாத், சீலம்பூர் உள்ளிட்ட பகுதிகளில், குடியுரிமை திருத்தச் சட்டத்திற்கு ஆதரவாகவும், எதிராகவும் போராட்டங்கள் நடைபெற்றன. அப்போது, இருதரப்பினருக்கு இடையே கலவரம் மூண்டது. இதனால், போலீசார் கண்ணீர் புகை குண்டுகளை வீசி கலவரத்தை கட்டுப்படுத்தினர். சில இடங்களில் துப்பாக்கிச்சூடும் நடத்தப்பட்டது. இந்த வன்முறை சம்பவங்களில், தலைமை காவலர், உளவுத்துறை அதிகாரி உட்பட இதுவரை, 38 பேர் உயிரிழந்துள்ளனர். 300-க்கும் மேற்பட்டோர் படுகாயமடைந்து, மருத்துவமனைகளில் சிகிச்சை பெற்று வருகின்றனர். பலரது நிலை கவலைக்கிடமாக இருப்பதால், பலி எண்ணிக்கை அதிகரிக்கக் கூடும் என்று அஞ்சப்படுகிறது.

இந்நிலையில், டெல்லி வன்முறையில் உயிரிழந்தோர் குடும்பத்துக்கு, தலா 10 லட்சம் ரூபாய் வழங்கப்படும் என்று, அம்மாநில முதலமைச்சர் திரு. அரவிந்த் கெஜ்ரிவால் அறிவித்துள்ளார். கலவரத்தில் வீடுகளை இழந்தோருக்கு 5 லட்சம் ரூபாய் வழங்கப்படும் என்றும், காயமடைந்தவர்களுக்கு இலவச சிகிச்சை பெற ஏற்பாடு செய்யப்படும் என்றும், அவர் தெரிவித்துள்ளார்.