பழம்பெரும் இந்தி நடிகர் விநோத் கண்ணா மும்பையில் இன்று காலமானார். அவருக்கு வயது 70.

பிரபல பாலிவுட் நடிகரும், தயாரிப்பாளருமான விநோத் கண்ணா, கடந்த 1968-ம் ஆண்டு இந்தி திரைப்படங்களில் நடிக்க தொடங்கினார். Mere Apne படத்தில் சிறப்பாக நடித்ததற்காக ரசிகர்கள் மனதில் இடம்பிடித்த விநோத் கண்ணா, தொடர்ந்து, Mera Gaon Mera Desh, Gaddaar, Jail Yatra, Inkaar, Amar Akbar Antony உள்ளிட்ட வெற்றிப் படங்களில் நடித்து புகழ்பெற்றார். இடையில் சில காலம் நடிப்புத் தொழிலை நிறுத்தியிருந்த விநோத் கண்ணா, 1980-களில் வெளியான Insaaf, Satyamev Jayate போன்ற படங்களில் மீண்டும் நடித்து ரசிகர்கள் மனதில் இடம்பெற்றார். ஓஷோ ரஜினீஷை தனது ஞானகுருவாக பின்பற்றிய விநோத் கண்ணா, பாலிவுட் திரையுலகில் தர்மேந்திரா, ராஜேஷ்கண்ணா, ஷமிக் கபூர் வரிசையில் பிரபல நடிகராக திகழ்ந்தார். பாரதிய ஜனதா கட்சியில் இணைந்து குர்தாஸ்பூர் மக்களவைத் தொகுதியில் வெற்றி பெற்று நாடாளுமன்ற உறுப்பினராக உள்ள விநோத் கண்ணா புற்றுநோய் காரணமாக மும்பை மருத்துவமனையில் அனுமதிக்கப்பட்டார். சிகிச்சை பலனின்றி விநோத் கண்ணா இன்று உயிரிழந்தார். விநோத் கண்ணாவுக்கு கவிதா என்ற மனைவியும், 3 மகன்களும், ஒரு மகளும் உள்ளனர்.