சந்திரயான் - 2 விண்கலத்தின் ஆர்பிட்டர் கூடுதலாக ஏழரை ஆண்டுகள் நிலவைச் சுற்றி வர வாய்ப்பு உள்ளது என்று இஸ்ரோ தலைவர் திரு.சிவன் நம்பிக்கை தெரிவித்துள்ளார்.

உலகளவில் பெரும் எதிர்பார்ப்பை ஏற்படுத்திய சந்திரயான் - 2 விண்கலத்தின் விக்ரம் லேண்டர், கடந்த 7 ஆம் தேதி, நிலவின் தென் துருவத்தில் தரையிறங்கும் போது, அதன் தகவல் தொடர்பு எதிர்பாராத வகையில் துண்டிக்கப்பட்டது. அண்மையில், விக்ரம் லேண்டரின் ஆயுட்காலமும் முடிவுக்கு வந்தது.

இந்நிலையில், ஒடிசா மாநிலம், புவனேஷ்வரில், செய்தியாளர்களிடம் பேசிய இஸ்ரோ எனப்படும் இந்திய விண்வெளி ஆராய்ச்சி மைய தலைவர் திரு. சிவன், சந்திரயான் - 2 திட்டம், 98 சதவீதம் வெற்றி பெற்றிருக்கிறது என்றும், அதன் ஆர்பிட்டர் ஓராண்டுக்கு செயல்பட திட்டமிடப்பட்டிருந்தாலும், மேலும் ஏழரை ஆண்டுகள் நிலவைச் சுற்றி வர வாய்ப்புள்ளது என்றும் கூறினார்.

விக்ரம் லேண்டரின் தகவல் தொடர்பு துண்டிக்கப்பட்டதற்கான காரணத்தை அறிய, தேசிய அளவில் கல்வியாளர்கள் மற்றும் இஸ்ரோ வல்லுனர் அடங்கிய குழு செயல்பட்டு வருகிறது என்றுக் கூறிய அவர், முழு திருப்தியை தருகிற வகையில், ஆர்பிட்டர் தொடர்ந்து அறிவியல் சோதனைகளை செய்து வருகிறது என்றும் ‍தெரிவித்தார்.

ஆர்பிட்டரில் 8 கருவிகள் உள்ளன என்றும், எதற்காக வடிவமைக்கப்பட்டிருந்தனவோ, அந்த நோக்கங்களை அவை சரியாக செய்து வருகின்றன என்றும் திரு.சிவன் கூறினார்.