ஐ.என்.எக்ஸ். மீடியா முறைகேடு வழக்கில் ப.சிதம்பரத்தை கைது செய்தது அமலாக்கத்துறை - திகார் சிறையில் நடத்திய விசாரணையைத் தொடர்ந்து நடவடிக்கை
Oct 16 2019 11:09AM
எழுத்தின் அளவு:
அ +
அ -
அ
ஐ.என்.எக்ஸ் மீடியா வழக்கில், முன்னாள் மத்திய அமைச்சர் ப.சிதம்பரத்திடம் இன்று காலை விசாரணை நடத்திய அமலாக்கத்துறை, அவரை கைது செய்தது.
ஐ.என்.எக்ஸ். மீடியா சட்டவிரோதப் பணப்பரிமாற்ற வழக்கில், சி.பி.ஐ., அதிகாரிகள் ப.சிதம்பரத்தை கைது செய்ததை அடுத்து, அவர் நீதிமன்றக் காவலில், திஹார் சிறையில் அடைக்கப்பட்டுள்ளார். இவ்வழக்கில் அமலாக்கத்துறையும், ஏற்கெனவே தனியாக வழக்குப்பதிவு செய்தது. சிதம்பரத்தை கைது செய்து விசாரணை நடத்த வேண்டியிருப்பதால், அதற்கு அனுமதி அளிக்குமாறு, டெல்லி சி.பி.ஐ. சிறப்பு நீதிமன்றத்தில், அமலாக்கத்துறை மனுதாக்கல் செய்தது.
மனு மீது விசாரணை நடத்திய டெல்லி சி.பி.ஐ. சிறப்பு நீதிமன்றம், ப.சிதம்பரத்திடம் 30 நிமிடங்கள் விசாரணை மேற்கொள்ளவும், தேவைப்பட்டால் கைது செய்து கொள்ளவும், அமலாக்கத்துறைக்கு அனுமதி வழங்கி நேற்று உத்தரவிட்டது.
இதையடுத்து, திஹார் சிறையில் உள்ள சிதம்பரத்திடம், அமலாக்கத்துறை அதிகாரிகள் 3 பேர், இன்று காலை விசாரணை நடத்தினர். இதனையொட்டி, சிதம்பரத்தின் மகன் கார்த்தி மற்றும் மனைவி நளினி, திஹார் சிறைக்கு விரைந்தனர். இந்நிலையில், அமலாக்கத்துறை, சிதம்பரத்தை கைது செய்துள்ளது. ஏற்கனவே, சிபிஐ-ஆல் கைது செய்யப்பட்டு ஜாமின் கிடைக்காமல் திண்டாடும் சிதம்பரத்தை, தற்போது அமலாக்கத்துறையும் கைது செய்திருப்பதால் அவருக்கு மேலும் நெருக்கடி ஏற்பட்டுள்ளது.