ஆந்திராவில் நிலவும் மணல் தட்டுப்பாட்டை கண்டித்து, தெலுங்கு தேசம் கட்சித் தலைவர் திரு.சந்திரபாபு நாயுடு உண்ணாவிரதத்தில் ஈடுபட்டுள்ளார்.

ஆந்திராவில் முதலமைச்சர் ஜெகன்மோகன் ரெட்டி, பதவியேற்றது முதலே பல அதிரடி நடவடிக்கைகளை எடுத்து வருகிறார். தற்போது ஆந்திர அரசு, மணல் விற்பனை குறித்து கொள்கை முடிவு எடுத்துள்ளதாகவும், இதனால், மாநிலத்தில் மணல் பற்றாக்குறை ஏற்பட்டுள்ளதாகவும் குற்றச்சாட்டு எழுந்தது.

இந்த நிலையில், மணல் தட்டுப்பாட்டை ஏற்படுத்திய ஜெகன்மோகன் ரெட்டியின் அரசை கண்டித்து, முன்னாள் முதலமைச்சர் திரு.சந்திரபாபு நாயுடு தலைமையில், தெலுங்கு தேசம் கட்சியினர் விஜயவாடாவில், உண்ணாவிரதப் போராட்டத்தில் ஈடுபட்டுள்ளனர். அப்போது பேசிய திரு.சந்திரபாபு நாயுடு, மணல் தட்டுப்பாடு காரணமாக கூலித் தொழிலாளிகள் முதல் தச்சுத் தொழிலாளிகள் வரை பாதிக்கப்பட்டுள்ளதாக தெரிவித்தார். இதனால், கட்டுமானத் தொழிலில் உள்ள 35 லட்சம் தொழிலாளர்களின் வருமானம் கேள்விக்குறியாகிவிட்டதாகவும் தெரிவித்தார்.