தருமபுரி மாவட்டம், தீர்த்தமலையில் உள்ள தீர்த்தகிரி ஈஸ்வரர் திருக்கோயிலில் மாசிமக தேர் திருவிழாவையொட்டி பல ஆயிரக்கணக்கான பக்தர்கள் கலந்து கொண்டு தேரை வடம் பிடித்து இழுத்து தரிசனம் செய்தனர்.

தருமபுரி மாவட்டம், தீர்த்தமலையில் உள்ள தீர்த்தகிரி ஈஸ்வரர் திருக்கோயிலில் 10 நாட்கள் நடைபெறும் மாசிமக விழா கடந்த 10ம் தேதி கொடியேற்றத்துடன் தொடங்கியது. இத்தேர்திருவிழாவையொட்டி, தினமும் பல்வேறு சிறப்பு பூஜைகளும், அபிஷேகங்களும் நடைபெற்றன. அதனைத்தொடர்ந்து தேரோட்டம் வெகுவிமரிசையாக நடைபெற்றது. இதில், விநாயகர், தீர்த்தகிரி ஈஸ்வரர், வடிவாம்பிகை உள்ளிட்ட மூன்று அலங்கரிக்கப்பட்ட தேர்களை பல ஆயிரக்கணக்கான பக்தர்கள் தேர்வடம் பிடித்து இழுத்து தரிசனம் செய்தனர். அப்போது பக்தர்கள் தேர்மீது உப்பு, மிளகு, பொரி, முத்துக்கொட்டை உள்ளிட்டவற்றை வாரியிரைத்து நேர்த்திக்கடனை நிறைவேற்றினர்.

நாகை மாவட்டம் திருமருகலை அடுத்த திருகண்ணபுரம் செளரிராஜபெருமாள் ஆலய மாசிமக உற்சவம் கடந்த 3ம் தேதி கொடியேற்றத்துடன் தொடங்கியது. முக்கிய நிகழ்ச்சியான தெப்போற்சவம் வெகுவிமரிசையாக நடைபெற்றது. இதனைமுன்னிட்டு செளரிராஜபெருமாள், தாயாருடன் ஆலய தீர்த்தமான நித்திய புஷ்கரணிக்கு எழுந்தருளினார். அங்கு மின்விளக்குகளால் அலங்கரிக்கப்பட்ட தெப்பத்தில் பெருமாளும், தாயாரும் மூன்று முறை வலம் வந்தனர். திரளான பக்தர்கள் தரிசனம் செய்தனர்.