ஸ்ரீராமானுஜரின் ஆயிரமாவது ஆண்டு விழாவை முன்னிட்டு ஸ்ரீபெரும்புதூர் பேரூராட்சி நிர்வாகம் மற்றும் இந்து சமய அறநிலையத்துறை சார்பில் மேற்கொள்ளப்பட்டுவரும் நடவடிக்கைகளை அமைச்சர்கள் நேரில் ஆய்வு செய்தனர்.

வைணவ சமயத்தை தோற்றுவித்த ஸ்ரீராமானுஜரின் ஆயிரமாவது ஆண்டு பிறந்தநாள் விழா, வரும் மே மாதம் 1-ம் தேதி கொண்டாடப்படவுள்ளது. இதற்காக, ராமானுஜர் பிறந்த ஸ்தலமான ஸ்ரீபெரும்புதூரில் முன்னேற்பாடுகள் நடைபெற்று வருகின்றன. சாலை இணைப்பு, குடிநீர் வசதி, கழிவறை வசதி, மின்விளக்குகள் அமைத்தல் ஆகியவற்றை ஸ்ரீபெரும்புதூர் பேரூராட்சி நிர்வாகமும், இந்து சமய அறநிலையத்துறையும் மேற்கொண்டு வருகின்றன. இந்த நடவடிக்கைகளை அமைச்சர்கள் திரு. கடம்பூர் ராஜூ, திரு. சேவூர் எஸ்.ராமச்சந்திரன் மற்றும் திரு.வெல்லமண்டி நடராஜன் ஆகியோர் நேரில் ஆய்வு செய்தனர். இந்த ஆய்வின் போது சட்டமன்ற உறுப்பினர், அரசு அதிகாரிகள் உள்ளிட்டோர் உடனிருந்தனர். ஸ்ரீராமானுஜர் போற்றி வணங்கிய காஞ்சிபுரம் வரதராஜப் பெருமாள் கோயிலில் மேற்கொள்ளப்பட்டு வரும் பணிகளை, அமைச்சர் திரு. சேவூர் எஸ். ராமச்சந்திரன் உள்ளிட்டோர் ஆய்வு மேற்கொண்டனர். இதனைத்தொடர்ந்து, காமாட்சியம்மன் கோயிலில் வெள்ளித்தேர் இழுத்து சிறப்பு பிரார்த்தனை மேற்கொள்ளப்பட்டது.

இதனிடையே, ஸ்ரீராமானுஜரின் 1000-மாவது ஆண்டு பிறந்தநாளையொட்டி இந்து சமய அறநிலையத்துறை மற்றும் பேரூராட்சி நிர்வாகம் சார்பில் சிறப்பு ஏற்பாடுகள் செய்யப்பட்டுள்ளதாக பேரூராட்சி நிர்வாக அலுவலர் திரு. முனியாண்டி தெரிவித்தார்.