ரமலான் பண்டிகையையொட்டி தமிழகத்தின் பல்வேறு பகுதிகளில் பள்ளிவாசல்களில் இஸ்லாமிய பெருமக்கள் சிறப்பு தொழுகையில் ஈடுபட்டனர்.

இஸ்லாமியப் பெருமக்களின் புனித ரமலான் மாத நோன்பு, பிறை தெரிந்ததால் இன்று முதல் தொடங்கும் என, தமிழக அரசின் தலைமைக் காஜி டாக்டர் சலாவுதீன் முகமது அயுப் அறிவித்தார்.

இதனையொட்டி, சென்னை திருவல்லிகேணியில் உள்ள பெரிய பள்ளிவாசல் உள்ளிட்ட பள்ளிவாசல்களில் சிறப்பு தொழுகைகள் நடைபெற்றன. இதில் திரளான இஸ்லாமிய பெருமக்கள் கலந்து கொண்டு பிரார்த்தனையில் ஈடுபட்டனர்.

திருச்சி மாவட்டத்தில் உள்ள பள்ளிவாசல்களில் நள்ளிரவில் சஹர் எனப்படும் சிறப்புத் தொழுகை நடைபெற்றது. அதனைத் தொடர்ந்து இன்று அதிகாலை ரமலான் தொழுகையும் நடைபெற்றது.

உலக புகழ்பெற்ற நாகூர் ஆண்டவர் தர்கா மற்றும் மாவட்டத்தில் உள்ள பள்ளிவாசல்களில், இரவு முதலே சிறப்பு தொழுகைகள் தொடங்கின.

மதுரையில் உள்ள பள்ளிவாசல்களில் இரவு நேர சிறப்பு தொழுகையில், ஏராளமான இஸ்லாமியர்கள் பங்கேற்று பிரார்த்தனையில் ஈடுபட்டனர். இதேபோல், மேலூர், திருமங்கலம், சிலைமான், சோழவந்தான் உள்ளிட்ட பல்வேறு பகுதிகளில் உள்ள பள்ளிவாசல்களிலும் இஸ்லாமியர்கள், இரவு நேர சிறப்பு தொழுகையில் ஈடுபட்டனர்.