தாமிரபரணி மகாபுஷ்கர விழாவையொட்டி பாபநாசம், அருகன்குளம் ஆற்றில் ஆயிரக்கணக்கான பக்தர்கள் நீராடி வழிபாடு நடத்தினர்.

தாமிரபரணி மகாபுஷ்கர விழாவையொட்டி, அருகன்குளத்தில் உள்ள தாமிரபரணி ஆற்றுக்கு ஆரத்தி நடைபெற்றது. 144 ஆண்டுகளுக்கு பின்னர் தாமிரபரணி மஹாபுஷ்கர திருவிழா நேற்று தொடங்கியது. இதனையொட்டி நெல்லை, பாபநாசம், அம்பாசமுத்திரம், கல்லிடைக்குறிச்சி உள்பட 149 பகுதிகளில் புஷ்கர விழாவிற்கான பூஜைகள் தொடங்கின. வரும் 23ம் ‍தேதி வரை நடைபெறும் மகாபுஷ்கர விழாவில், தமிழகம் மட்டுமின்றி உள்நாட்டு மற்றும் வெளிநாட்டு பக்தர்கள் லட்சக்கணக்கானோர் கலந்துக் கொண்டு வழிபாடு செய்ய உள்ளனர். இதற்காக பல்வேறு ஆன்மீக அமைப்புகள் சார்பில் சிறப்பு ஏற்பாடு செய்யப்பட்டுள்ளது.

இந்நிலையில், பல்வேறு மாநிலங்களில் இருந்து வந்திருந்த சுவாமிகள், பாபநாசம் பகுதியில் நேற்று புனித நீராடி பூஜைகள் செய்தனர். இதனைத்தொடர்ந்து நேற்று மாலை தாமிரபரணி அன்னைக்கு ஆரத்தி நிகழ்ச்சி நடைபெற்றது. இதற்காக காசியில் இருந்து கொண்டு வரப்பட்டுள்ள பூஜை பொருட்களை கொண்டு ஆரத்தி நடைபெற்றது. இதில் திரளான பக்தர்கள் கலந்துக்கொண்டு சாமி தரிசனம் செய்தனர்.

இதேபோல் நெல்லை சந்திப்பு அருகன்குளம் பகுதியிலும் பக்தர்கள் ஏராளமானோர் தாமிரபரணி ஆற்றில் நீராடி சுவாமி தரிசனம் செய்தனர்.

இந்நிலையில் ஆளுநர் பன்வாரிலால் புரோகித் நேற்று இரவு சேரன்மகாதேவி அருகேயுள்ள திருப்படைமருதூர் பகுதிக்கு சென்று அங்கு தாமிபரணி ஆற்றுக்கு புஷ்கர திருவிழாவையொட்டி சிறப்பு பூஜை நடத்தினர். இதனைத்தொடர்ந்து தாமிரபரணி ஆற்றுக்கு ஆரத்தி எடுக்கப்பட்டது. இதில் திரளான பக்தர்கள் கலந்துக்கொண்டு தரிசனம் செய்தனர்.