தூத்துக்குடி மாவட்டம் குலசேகரபட்டிணம் முத்தராமன் கோயில் தசரா திருவிழாவின் முக்கிய நிகழ்சியான மகிஷா சூரசம்ஹாரம் நள்ளிரவு வெகு விமரிசையாக நடைபெற்றது. இதில் லட்சக்‍கணக்‍கான பக்‍தர்கள் கலந்து கொண்டனர்.

இந்தியாவில் மைசூருக்கு அடுத்தபடியாக தசரா திருவிழா வெகு சிறப்பாக கொண்டாடப்படும் குலசேகரபட்டிணம் முத்தாரம்மன் கோயிலில், தசரா திருவிழா கடந்த மாதம் 29ம் தேதி கொடியேற்றத்துடன் தொடங்கியது. முக்‍கிய நிகழ்ச்சியாக, மகிஷா சூரசம்ஹாரம் நேற்று நள்ளிரவு நடைபெற்றது. இதற்காக அம்மனுக்கு சிறப்பு பூஜைகள் நடைபெற்றன. அம்மன் சிம்ம வாகனத்தில் கோயில் கடற்கரையில் உள்ள சிதம்பரேஸ்வரர் கோயில் முன்பு எழுந்ருளினார். அங்கு மகிஷா சூரனை வதம் செய்யும் நிகழ்ச்சி நடைபெற்றது. இதில் தமிழகம் முழுவதும் இருந்து பல லட்சம் பகதர்கள் கலந்து கொண்டனர்.

மகிஷா சூரசம்ஹாரம் முடிந்ததும், வேடமணிந்து விரதம் இருந்த பக்தர்கள் கடலில் புனித நீராடி தங்கள் விரதத்தினை முடித்து கொண்டனர். மகிஷாசூரசம்ஹார நிகழ்ச்சியை முன்னிட்டு 2 ஆயிரம் போலீசார் பாதுகாப்பு பணியில் ஈடுபடுத்தப்பட்டிருந்தனர். நூற்றுக்கும் மேற்பட்ட சிறப்புப் பேருந்துகள் இயக்‍கப்பட்டன.

இதேபோல், திண்டுக்கல் மாவட்டம் பழனி மலைக்கோயிலில் விஜயதசமி நிறைவு விழாவை முன்னிட்டு, அம்பு, வில் சகிதமாக முத்துக்குமாரசுவாமி புறப்பாடு மற்றும் மற்றும் மகிஷாசுர வதம் நிகழ்ச்சி நடைபெற்றது. தொடர்ந்து மலைக்கோயில், அருள்மிகு பெரியநாயகியம்மன் கோயில் மற்றும் அருள்மிகு பெருமாள் கோயில்களில் இரவு சம்ப்ரோக்‍ஷண பூஜைகள் நடத்தப்பட்டு அர்த்தஜாம பூஜை நடைபெற்றது.

ராமேஸ்வரம் ராமநாதசுவாமி திருக்‍கோயிலில், மஹிஷாசுரனை வதம் செய்யும் நிகழ்வு கோலாகலமாக நடைபெற்றது. இதனைக்‍ காண ராமேஸ்வரம் சுற்றுவட்டார பகுதிகளில் இருந்து திரளான பக்தர்கள் வருகை தந்தனர். வதம் செய்யும் நிகழ்ச்சியை பார்த்து ரசித்ததுடன், சுவாமி மற்றும் அம்பாளை தரிசனம் செய்தனர்.