வங்கதேசத்தில் நடைபெற்று வரும் ஆசிய கோப்பை ஹாக்கி போட்டியில் இந்திய அணி தனது முதல் ஆட்டத்தில் ஜப்பான் அணியை 5-1 என்ற கோல் கணக்கில் வீழ்த்தி அபார வெற்றி பெற்றது.

ஆடவருக்கான 10-வது ஆசிய கோப்பை ஹாக்கி தொடர் வங்கதேச தலைநகர் டாக்காவில் நடைபெற்று வருகிறது. இன்று நடைபெற்ற லீக் ஆட்டத்தில் இந்திய அணி தனது முதலாவது ஆட்டத்தில் , ஜப்பான் அணியை எதிர்கொண்டது. போட்டி தொடங்கிய 3-வது நிமிடத்தில் இந்திய வீரர் Sunil முதல் கோல் அடித்தார். அடுத்த சில நிமிடத்தில் ஜப்பான் அணி ஒரு கோல் அடித்தது. இதனைதொடர்ந்து 22-வது நிமிடத்தில் இந்திய வீரர் Lalit Upadhyay 2-வது கோல் அடித்தார். முதல் பாதி ஆட்டத்தில் இந்திய அணி 2-1 என்ற கோல் கணக்கில் முன்னிலை பெற்றது.

2-வது பாதி ஆட்டத்தில் சிறப்பாக விளையாடிய இந்திய அணி 33, 35 மற்றும் 48-வது நிமிடத்தில் கோல்கள் அடித்து அசத்தியது. ஆனால் கடைசி வரை போராடியும் ஜப்பான் அணியால் மேற்கொண்டு கோல் எதுவும் அடிக்க முடியவில்லை. இதன் மூலம் 5-1 என்ற கோல் கணக்கில் இந்திய அணி அபார வெற்றி பெற்றது. இந்திய அணி தனது 2-வது ஆட்டத்தில் வங்கதேச அணியுடன் வரும் வெள்ளிக்கிழமை மோதுகிறது.