கொரோனா வைரஸ் தோன்றிய ஜனவரி மாதத்தில் சுமார் 4 லட்சத்து 30 ஆயிரம் மக்கள் சீனாவிலிருந்து அமெரிக்கா பயணம் செய்துள்ளதாக தகவல் வெளியாகியுள்ளது.

கொரோனா பரவல் குறித்து அமெரிக்கா பயணக்கட்டுப்பாடுகளை விதிப்பதற்கு முன்பு சீனாவில் இருந்து அமெரிக்காவின் 17 நகரங்களுக்கு ஆயிரத்து 300 நேரடி விமானங்கள் இயக்கப்பட்டு வந்தன. கிட்டத்தட்ட 4 லட்சத்து 30 ஆயிரம் பேர் அமெரிக்காவிற்கு வந்துள்ளதாக பிரபல அமெரிக்க செய்தி நிறுவனம் செய்தி வெளியிட்டுள்ளது. லாஸ் ஏஞ்சல்ஸ், சான் பிரான்சிஸ்கோ, நியூயார்க், சிகாகோ உள்ளிட்ட விமான நிலையங்கள் வாயிலாக பெரும்பாலானோர் அமெரிக்காவிற்கு வந்ததும் தெரியவந்துள்ளது. மேலும் வைரஸ் பரவத் தொடங்கிய வூகான் நகரிலிருந்து ஆயிரக்கணக்கானோர் நேரடியாக அமெரிக்காவிற்கு வந்ததாக தகவல் வெளியாகியுள்ளது. இந்த காலகட்டத்தில் அமெரிக்க விமான நிலையங்களில் தீவிரமான பரிசோதனைகள் மேற்கொள்ளப்படவில்லை எனவும் கூறப்படுகிறது. ஜனவரி 20-ம் தேதிக்குப் பின்னர் தான் அமெரிக்‍காவில் பரிசோதனைகள் தீவிரப்படுத்தப்பட்டதாகவும் இதன்மூலம் கொரோனா வைரஸ் பரவலை தடுக்கும் விஷயத்தில் அமெரிக்கா அரசு மெத்தனமாக இருந்ததாகவும் குற்றச்சாட்டு எழுந்துள்ளது.