இத்தாலியில் பிரசித்திபெற்ற சுற்றுலாத் தளமான இஸ்சியா தீவில் ஏற்பட்ட நிலநடுக்‍கத்தால் இருவர் பலியாகியுள்ளனர்.

ஐரோப்பிய நாடுகளில் ஒன்றான இத்தாலியில் நேபிள்ஸ் வளைகுடா பகுதியில் இஸ்சியா தீவில் நேற்று முன்தினம் அங்கு நிலநடுக்கம் ஏற்பட்டது. இந்த நிலநடுக்கம் ரிக்டர் அளவுகோலில் 4 புள்ளி 0 ஆக பதிவானது. இது சக்திவாய்ந்த நிலநடுக்கம் இல்லையென்ற போதிலும், அங்கு பெருமளவிலான பாதிப்பை ஏற்படுத்திவிட்டது. நிலநடுக்கத்தின் போது கட்டிடங்கள் குலுங்கியதால் ஓட்டல்கள் மற்றும் விடுதிகளில் தங்கியிருந்த சுற்றுலா பயணிகள் அலறிஅடித்துக்கொண்டு வெளியே ஓடி வந்தனர். பின்னர் அவர்கள் வீதிகளிலும், திறந்தவெளி மைதானங்களிலும் தஞ்சம் புகுந்தனர்.

நிலநடுக்கத்தின் போது கசாமிக்சியோலா நகரில் உள்ள தேவாலயம் உள்பட 6 கட்டிடங்கள் இடிந்து விழுந்து தரைமட்டமாகின. தேவாலயம் இடிந்து விழுந்தபோது அதன் இடிபாடுகளில் சிக்கி பெண் ஒருவர் பரிதாபமாக உயிர் இழந்தார். அதே போல் வீடு ஒன்று இடிந்து விழுந்ததில், இடிபாடுகளில் சிக்கி ஒருவர் உயிர் இழந்தார். மேலும் 25-க்கும் மேற்பட்டோர் படுகாயம் அடைந்தனர்.